ការងារមិនថោកទាបពេលព្រឹកស៊ីឈ្នួលសកដូងពេលថ្ងៃអូសបន្លែពេលយប់អូសទឹកលក់ បុរសវ័យចំណាស់ដែលខិតខំធ្វើការដើម្បីចិញ្ចឹមគ្រួសារនេះ


ឈ្មោះប៊ី សុទ្ធ អាយុ៦៧ឆ្នាំ



រាជធានីភ្នំពេញ ៖ ទោះបីជាឈានចូលដល់បច្ឆិមវ័យហើយក៏ដោយ ក៏បុរសវ័យចំណាស់ម្នាក់នេះខិតខំធ្វើការទាំងថ្ងៃទាំងយប់មិនខ្លាចនឿយហត់ដើម្បីជីវិត ដោយពេលព្រឹកគាត់ទៅស៊ីឈ្នួលសកដូងឱ្យគេ ថ្ងៃបន្ដិចទៅអូសបន្លែ-ផ្លែឈើ និងយប់ឡើងសម្រាកតាមកន្លែងលក់ដូងជុំវិញផ្សារដើមគ ជួនកាលតាមគ្រែក្រៅផ្សារ លុះដល់ម៉ោង១រំលងអធ្រាត្រទៅអូសទឹកលក់បន្ត ។

បុរសវ័យចំណាស់ដែលខិតខំធ្វើការដើម្បីចិញ្ចឹមគ្រួសារនេះឈ្មោះប៊ី សុទ្ធ អាយុ៦៧ឆ្នាំ មានស្រុកកំណើតនៅភូមិបឹងគ្រំលើ ឃុំបឹងគ្រំ ស្រុកល្វាឯម ខេត្ដកណ្ដាល ប្រពន្ធគាត់ឈ្មោះជុំ ប៉ាក់ អាយុ៥៧ឆ្នាំ មានកូនពីរនាក់ តែម្នាក់មានគ្រួសារទៅរស់នៅឆ្ងាយ សល់តែកូនស្រីមួយធ្វើកម្មការិនីនៅរោងចក្រ ហើយប្រពន្ធគាត់មានជំងឺទឹកចូលសួតកំពុងព្យាបាលរាល់ថ្ងៃ ។ គាត់រៀបរាប់ថា ពេលប្រពន្ធមានជំងឺនេះគាត់ក៏លក់ដីស្រែអស់ ដើម្បីមើលជំងឺ ហើយសព្វថ្ងៃមិនមានដីសំរាប់ធ្វើស្រែចំការទៀតទេ ទើបសំរេចចិត្ដមកស្នាក់នៅផ្សារដើមគតាំងពីឆ្នាំ១៩៩៥មក ដើម្បីស៊ីឈ្នួលធ្វើការឱ្យគេបានកម្រៃចិញ្ចឹមជីវិតបន្តដោយមិនរើសថា ការងារអ្វីនោះទេ ក្រៅតែពីមុខរបរទុច្ចរិត ។ គាត់បន្តថា ពេលយប់ឡើងដើរសំរាកតាមកន្លែងលក់ដូងជុំវិញផ្សារ ឬតាមគ្រែក្រៅផ្សារ ពេលព្រឹកគាត់ទៅស៊ីឈ្នួលសកដូង លុះដល់ម៉ោងប្រមាណ១០ព្រឹកទៅស៊ីឈ្នួលអូសបន្លែ ផ្លែឈើឱ្យគេ និងនៅម៉ោង១រំលងអធ្រាត្រទៅអូសទឹកលក់ឱ្យអ្នកលក់បន្លែ និងស៊ីឈ្នួលអូសបន្លែ ។

បុរសវ័យចំណាស់រូបនេះនិយាយទៀតថា គាត់ប្រកបរបរសកដូងនេះតាំងពីក្នុងមួយថ្ងៃសកបាន២០០ឡូ ទៅ៣០០ឡូ ចំណែកការអូសបន្លែវិញអូសតាំងពីមួយជើងបាន២០០រៀលទៅ៣០០រៀល តែបច្ចុប្បន្នគាត់សកដូងក្នុងមួយថ្ងៃបានតែពី៣០ឡូទៅ៧០ឡូទេ ដោយសារគាត់មានវ័យកាន់តែចាស់កម្លាំងក៏មិនខ្លាំងដូចមុន។ ម្យ៉ាងទៀតការសកដូងនេះ ប្រើកម្លាំងខ្លាំងហើយឈឺទ្រូងទៀតផង ព្រោះយើងត្រូវជួយលើកបាវដូងដាក់លើរថយន្ដ ឬម៉ូតូឱ្យអ្នកទិញទៀត រីឯប្រាក់កម្រៃវិញក្នុង១ឡូបាន១៥០រៀល ។

ចំពោះការអូសទឹកលក់វិញ ជាធម្មតាគាត់ភ្ញាក់នៅម៉ោង១រំលងអធ្រាត្រដើម្បីអូសលក់ឱ្យអ្នកលក់បន្លែ និងអ្នកលក់កាហ្វេដោយក្នុងមួយប៊ីដុងចំណុះ៣០លីត្រ គាត់ទិញពីផ្ទះអ្នកលក់អង្ករដែលនៅជិតផ្សារដើមគរនេះដែរ មួយប៊ីដុងថ្លៃ៣០០រៀល យកមកលក់បានមួយប៊ីដុង៦០០រៀល ។ ក្នុងមួយយប់គាត់អូសលក់បាន៨ប៊ីដុង ប៉ុន្ដែទឹកដែលគាត់អូសគឺអូសដាក់ឱ្យម៉ូយដែលកុម្មង់ប៉ុណ្ណោះ បន្ទាប់មកគាត់ស៊ីឈ្នួលអូសបន្លែរហូតដល់ម៉ោង៥ភ្លឺទើបសម្រាក ។ លុះនៅម៉ោងប្រហែល៧ព្រឹកគាត់ទៅសកដូងឱ្យគេ រហូតដល់ម៉ោង១០ត្រឡប់មកអូសបន្លែ-ផ្លែឈើវិញម្ដង ដោយអូសបន្លែក្នុងមួយជើងបានពី១.០០០រៀល ទៅ២.០០០រៀល ក្នុងមួយថ្ងៃរកប្រាក់បានពី៨.០០០រៀលទៅ១៦.០០០រៀល ។ គាត់បានឱ្យដឹងថា ក្នុងមួយពេលគាត់ហូបបាយអស់២.០០០រៀល ជួនកាលទិញបាយច្រកថង់៥០០រៀលយកមកហូប ។

បុរសវ័យចំណាស់ប៊ី សុទ្ធ បានរៀបរាប់បន្ដថា គាត់មានការព្រួយបារម្ភពីសុខភាពដែលកាន់តែចាស់ និងចុះខ្សោយខ្លាចមិនអាចរកប្រាក់សំរាប់ចិញ្ចឹមគ្រួសារបាន ម្យ៉ាងទៀតប្រាក់ដែលគាត់រកបានរាល់ថ្ងៃសំរាប់តែព្យាបាលប្រពន្ធដែលមានជំងឺទឹកចូលសួតនៅឯស្រុកប៉ុណ្ណោះ មិនមានប្រាក់កាសសល់សំរាប់ទុកដាក់ទេ ។ ចំណែកម៉ូយជាអ្នកលក់កាហ្វេដែលទិញទឹករបស់គាត់បាននិយាយថា គាត់ខំប្រឹងតស៊ូណាស់ ទោះបីមេឃភ្លៀងរអិលដួលយ៉ាងណា ក៏គាត់ខំអូសមិនហ៊ានឈប់ដែរ អ៊ីចឹងហើយទើបពេលគេអស់ទឹកគេមិនដែលទិញទឹកអ្នកផ្សេងទេចាំទិញតែទឹករបស់គាត់ ម្យ៉ាងទៀតបើដឹងថាគេជិតអស់ទឹកគាត់ទៅចងមុងសំរាកចាំនៅជិតកន្លែងនោះតែម្ដង ៕

Quote of the news from Koh Santepheap Daily

ដោយ ៖ អប្សរា

ថ្ងៃ សុក្រ ទី ១៨ ខែ មិនា ឆ្នាំ ២០១១





មន្ត្រីអាមេរិកទទួលបន្ទុកកិច្ចការសុំកូនចិញ្ចឹមមកបំពេញទស្សនកិច្ចនៅប្រទេសកម្ពុជាពីថ្ងៃទី១៧ ដល់ថ្ងៃទី១៨ មីនា ២០១១



រាជធានីភ្នំពេញ ៖ យោងតាមមន្ត្រីស្ថានទូតអាមេរិកប្រចាំប្រទេសកម្ពុជាបានឱ្យដឹងកាលពីព្រឹកថ្ងៃទី១៨ មីនា ២០១១ តាមរយៈអ៊ីម៉ែលថា លោកស្រីឯកអគ្គរដ្ឋទូតស៊ូសាន ឆេខប (Susan Jacob) ទីប្រឹក្សាពិសេសសម្រាប់កុមារបានធ្វើទស្សនកិច្ចក្នុងប្រទេសកម្ពុជាកាលពីថ្ងៃទី១៧ ដល់ទី១៨ មីនា ២០១១ ដើម្បីចូលរួមកិច្ចប្រជុំស្វែងរកការពិតស្តីពីការសុំកូនចិញ្ចឹមទៅបរទេស ។

ស្ថានទូតអាមេរិកបន្តថា លោកស្រីឯកអគ្គរដ្ឋទូត Susan Jacob បានជួបជាមួយមន្ត្រីរាជរដ្ឋាភិបាល និងតំណាងមកពីស្ថាប័នដទៃទៀត ដើម្បីពិភាក្សាពីស្ថានភាពនៃការអនុវត្តការគោរពតាមអនុសញ្ញាក្រុងឡាអេ ស្តីពីការសុំកូន

ចិញ្ចឹម ។

ស្ថានទូតបន្តទៀតថាសហរដ្ឋអាមេរិកសង្ឃឹមថានឹងបានធ្វើការជាមួយរដ្ឋាភិបាលកម្ពុជាក្នុងពេលរាជរដ្ឋាភិបាលកម្ពុជាបង្កើតប្រព័ន្ធសុខុមាលភាពកុមារ ហើយនឹងធ្វើការពិនិត្យយ៉ាងហ្មត់ចត់លើបទប្បញ្ញត្តិ សម្រាប់អនុវត្តទាក់ទងនឹងច្បាប់ថ្មីស្តីពីការសុំកូនទៅបរទេសពេលបទប្បញ្ញត្តិទាំងនោះចេញ ។

ស្ថានទូតអាមេរិកបន្តថា «យើងសុំសរសើរដល់រាជរដ្ឋាភិបាលចំពោះជោគជ័យដែលទទួលបានកន្លងមក ក្នុងការបង្កើនការការពារដល់កុមារងាយរងគ្រោះ ។ សហរដ្ឋអាមេរិកមិនទាន់កំណត់ថ្ងៃខែសម្រាប់ការបន្តឡើងវិញនូវការសុំកូនចិញ្ចឹមទៅបរទេសពីប្រទេសកម្ពុជានៅឡើយទេ៕

Quote of the news from Koh Santepheap Daily

ដោយ ៖ អប្សរា

ថ្ងៃ សុក្រ ទី ១៨ ខែ មិនា ឆ្នាំ ២០១១



សម្តេចតេជោហ៊ុន សែន ៖ ស្ថាប័នពាក់ព័ន្ធត្រូវបើកប្រាក់ខែប្រាក់ឧបត្ថម្ភដល់ជនពិការ-និវត្តជនឱ្យបានទៀងទាត់



រាជធានីភ្នំពេញ ៖ សម្តេចតេជោនាយករដ្ឋមន្ត្រីហ៊ុន សែន បានណែនាំឱ្យក្រសួង ស្ថាប័ន និងអាជ្ញាធរពាក់ព័ន្ធទាំងអស់គិតគូរពីការបើកប្រាក់ខែ និងប្រាក់ឧបត្ថម្ភនានារបស់ជនពិការ និងនិវត្តជនឱ្យបានត្រឹមត្រូវ និងទៀងទាត់ ទាន់ពេលវេលា ចៀសវាងការបង្កផលលំបាកដល់ពួកគាត់ ។ ជាមួយគ្នានេះដែរ សម្តេចអគ្គមហាសេនាបតីតេជោហ៊ុន សែន ក៏បានស្នើឱ្យអង្គភាពប្រឆាំងអំពើពុករលួយ ត្រូវចូលរួមអង្កេតមើលចំពោះក្រសួង-ស្ថាប័នពាក់ព័ន្ធទាំងឡាយណា ដែលមានការកេងប្រវ័ញ្ចប្រាក់ខែ ឬប្រាក់ឧបត្ថម្ភនានារបស់ជនពិការ និងនិវត្តជនទាំងនោះ គឺត្រូវចាត់ការតាមនីតិវិធីច្បាប់ ។ ការណែនាំរបស់សម្តេចតេជោហ៊ុន សែន យ៉ាងដូច្នេះគឺបានធ្វើឡើងក្នុងសម័យប្រជុំពេញអង្គប្រចាំសប្តាហ៍គណៈរដ្ឋមន្ត្រីដែលបានប្រារព្ធធ្វើនៅវិមានមិត្តភាពទីស្តីការគណៈរដ្ឋមន្ត្រីនាព្រឹកថ្ងៃសុក្រ ទី១៨ មីនា ២០១១ ៕



Quote of the news from Koh Santepheap Daily

ដោយ ៖ អប្សរា

ថ្ងៃ សុក្រ ទី ១៨ ខែ មិនា ឆ្នាំ ២០១១





យុវសិស្សទំនើងវិទ្យាល័យវត្តភ្នំ៤នាក់ប្រឈមមុខនឹងតុលាការ



(រូបថត ប៊ុនរី)

យុវសិស្សទំនើងវិទ្យាល័យវត្តភ្នំ៤នាក់ប្រឈមមុខនឹងតុលាការ



រាជធានីភ្នំពេញ ៖ នគរបាលផ្នែកនីតិវិធីនៃអធិការដ្ឋាននគរបាលខណ្ឌដូនពេញបាននិយាយថា យុវសិស្សទំនើង៤នាក់ដែលវាយតប់គ្នាបង្កឱ្យបាត់បង់សណ្តាប់ធ្នាប់ និងភ្ញាក់ផ្អើលពេញវិទ្យាល័យវត្តភ្នំ ស្ថិតក្នុងសង្កាត់ស្រះចក ខណ្ឌដូនពេញ កាលពីរសៀលថ្ងៃទី១៧ មីនា ២០១១ រួមទាំងនគរបាលមហាផ្ទៃ២នាក់ទៀតនឹងត្រូវកសាងសំណុំរឿងបញ្ជូនទៅតុលាការ ។

យោងតាមរបាយការណ៍របស់សមត្ថកិច្ចឱ្យដឹងថា កាលពីថ្ងៃទី១៧ មីនា២០១១ វេលាម៉ោង២និង២០នាទីរសៀល មានយុវសិស្ស២ក្រុមបានដេញវាយតប់គ្នានៅកន្លែងលក់ទឹកអំពៅក្នុងវិទ្យាល័យវត្តភ្នំ សង្កាត់ស្រះចក ខណ្ឌដូនពេញ និងបានយកកៅអីជ័រគប់គ្នាបង្កភាពអនាធិបតេយ្យដោយពុំខ្លាចរអានាយកសាលាបន្តិចណាឡើយ ។ មិនអស់ចិត្តភាគីម្ខាងៗបានទូរស័ព្ទហៅបក្សពួក ខ្លះហៅបងប្អូនជានគរបាលទៅសងសឹកគ្នានៅចំណុចខាងជើងសាលាផ្លូវលេខ៧៤ ប៉ុន្តែត្រូវបានកម្លាំងនគរបាលមូលដ្ឋានចុះទៅអន្តរាគមន៍ទាន់ពេលវេលា និងឃាត់ខ្លួន២ភាគីចំនួន៦នាក់ ក្នុងនោះ មាននគរបាលព្រហ្មទណ្ឌក្រសួងមហាផ្ទៃ២នាក់ ដែលទទួលរងការចោទប្រកាន់ដកកាំភ្លើងគំរាមគូបដិបក្ស ។

យុវសិស្សទំនើងដែលបង្កភាពអនាធិបតេយ្យក្នុងវិទ្យាល័យវត្តភ្នំ ហើយសមត្ថកិច្ចឃាត់ខ្លួនក្រុមទី១ មានឈ្មោះកែវ ចំរើន ភេទប្រុស អាយុ១៩ឆ្នាំ ស្នាក់នៅផ្ទះលេខ២៦៣ ភូមិសាមគ្គី សង្កាត់ឫស្សីកែវ ខណ្ឌឫស្សីកែវ និងឈ្មោះស៊ឹម វាសនា ភេទប្រុស អាយុ១៨ឆ្នាំ ស្នាក់នៅផ្ទះលេខ២៧៧ ផ្លូវលេខ៨៦ សង្កាត់ស្រះចក ខណ្ឌដូនពេញ ជនទាំងពីរនេះជាសិស្សវិទ្យាល័យវត្តភ្នំ រីឯក្រុមទី២ មាន១-ឈ្មោះហ៊ត ឆៃឡង ភេទប្រុស អាយុ១៧ឆ្នាំ ស្នាក់នៅផ្ទះលេខ៥៤ ផ្លូវលេខ៧០ សង្កាត់ស្រះចក ខណ្ឌដូនពេញ ២-ឈ្មោះគង់ ភារម្យ ភេទប្រុស អាយុ១៧ឆ្នាំ ស្នាក់នៅផ្ទះលេខ៣២៣ ផ្លូវលំ សង្កាត់ឫស្សីកែវ ខណ្ឌឫស្សីកែវ (ជនទាំង២ជាសិស្សវិទ្យាល័យវត្តភ្នំ) ៣-ឈ្មោះហ៊ត ហះរ៉េត ភេទប្រុស អាយុ២៨ឆ្នាំ និង៤-ឈ្មោះឃន សំណាង ភេទប្រុស អាយុ២៤ឆ្នាំ (ជនទាំង២នេះជានគរបាលក្រសួងមហាផ្ទៃ)៕

Quote of the news from Koh Santepheap Daily

ដោយ ៖ អប្សរា

ថ្ងៃ សុក្រ ទី ១៨ ខែ មិនា ឆ្នាំ ២០១១









លិខិតសុំលើកលែងទោសពីព្រះមហាក្សត្រដល់អ្នកទោសសៀមត្រូវបញ្ជូនទៅក្រសួងយុត្តិធម៌ហើយ



(រូបថត ស.សុខុម)

អ្នកទោសថៃ២នាក់ដែលបច្ចុប្បន្នកំពុងជាប់ឃុំឃាំងនៅពន្ធនាគារព្រៃស



រាជធានីភ្នំពេញ ៖ លោកកុយ គួង អនុរដ្ឋលេខាធិការក្រសួងការបរទេសកម្ពុជា បានមានប្រសាសន៍ឱ្យកោះសន្តិភាពដឹងកាលពីថ្ងៃព្រឹកទី១៨ មីនា ២០១១ ថា ក្រសួងការបរទេសកម្ពុជាបានទទួលការស្នើសុំពីមន្ត្រីស្ថានទូតថៃប្រចាំនៅព្រះរាជាណាចក្រកម្ពុជា តាមរយៈលិខិតមួយកាលពីល្ងាចថ្ងៃទី១៦ មីនា ដើម្បីសុំព្រះរាជទានទោសពីព្រះមហាក្សត្រកម្ពុជា ព្រះករុណា ព្រះបរមនាថ នរោត្តម សីហមុនី ដល់ជនជាតិសៀម២នាក់ ដែលបច្ចុប្បន្នកំពុងជាប់ឃុំឃាំងនៅពន្ធនាគារព្រៃស លិខិតនេះត្រូវបានបញ្ជូនទៅដល់ក្រសួងយុត្តិធម៌តាមនីតិវិធី ។

លោកកុយ គួង បន្តថា ក្រសួងការបរទេសនៅមិនទាន់បានទទួលព័ត៌មានពីក្រសួងយុត្តិធម៌ ឬពីខុទ្ទកាល័យរបស់ព្រះមហាក្សត្រនៅឡើយទេ ជុំវិញការស្នើសុំសេចក្តីលើកលែងទោសពីព្រះមហាក្សត្រ សម្រាប់អ្នកទោសថៃ២នាក់នោះ ។ លោកកុយ គួង បន្តថា ទោះបីយ៉ាងណា កម្ពុជាត្រូវតែអនុវត្តតាមនីតិវិធីច្បាប់របស់ប្រទេសកម្ពុជាចំពោះជនជាតិសៀមទាំងនោះ ។ ក្រសួងការបរទេសកម្ពុជាក្រោយពីបានទទួលលិខិតពីមន្ត្រីស្ថានទូតថៃប្រចាំនៅព្រះរាជាណាចក្រកម្ពុជារួចហើយ តាមនីតិវិធីត្រូវបញ្ជូនបន្តទៅក្រសួងយុត្តិធម៌ ។

លោកប៉ិច វិច្ឆិកា មេធាវីជនជាតិសៀម បានថ្លែងថា លោកនៅមិនបានទទួលព័ត៌មានពីការស្នើសុំរបស់ក្រសួងការបរទេសថៃ ឬស្ថានទូតថៃសុំឱ្យមានការព្រះរាជទានទោសពីព្រះមហាក្សត្រកម្ពុជា ដោះលែងកូនក្តីរបស់លោកនៅឡើយទេ រហូតមកដល់ថ្ងៃទី១៨ មីនា ២០១១ ។

គួររំលឹកថា កាលពីថ្ងៃទី២៩ ធ្នូ ២០១០ មានជនជាតិសៀម៧នាក់ ក្នុងនោះមានស្រី២នាក់ ចូលមកក្នុងទឹកដីព្រះរាជាណាចក្រកម្ពុជានៅក្នុងបន្ទាត់ព្រំដែនខេត្តបន្ទាយមានជ័យ ភូមិជោគជ័យ ឃុំអូរ៣ជាន់ ហើយត្រូវបានកងកម្លាំងប្រដាប់អាវុធនៃកងយោធពលខេមរភូមិន្ទកម្ពុជាចាប់ខ្លួនរួចបញ្ជូនមករាជធានីភ្នំពេញទាំងយប់ ៕

Quote of the news from Koh Santepheap Daily

ដោយ ៖ អប្សរា

ថ្ងៃ សុក្រ ទី ១៨ ខែ មិនា ឆ្នាំ ២០១១

សម្តេចតេជោ ៖ សង្គ្រាមឈ្លានពានរបស់ថៃថោកទាបបំផុត...កម្ពុជាត្រៀមលក្ខណៈ រួចរាល់សម្រាប់អ្នកសង្កេតការណ៍...ចុងក្រោយនឹងទៅតុលាការអន្តរជាតិ

(ប្រុសកោះ)

ថ្ងៃ ព្រហស្បតិ៍ ទី ៣ ខែ មិនា ឆ្នាំ ២០១១



(រូបថត ច័ន្ទថា)

ក្នុងឱកាសអញ្ជើញជាអធិបតីនៃទិវាវប្បធម៌ជាតិលើកទី១៣ នៅសាលសន្និសីទចតុមុខ



រាជធានីភ្នំពេញ ៖ ក្នុងឱកាសអញ្ជើញជាអធិបតីនៃទិវាវប្បធម៌ជាតិលើកទី១៣ នៅសាលសន្និសីទចតុមុខ កាលពីព្រឹកថ្ងៃទី៣ មីនា ២០១១ នេះ សម្តេចតេជោនាយករដ្ឋមន្ត្រីហ៊ុន សែន បានមានប្រតិកម្មខ្លាំងៗចំពោះមហិច្ឆតាអាក្រក់របស់ថៃថា ការបាញ់មកលើប្រាសាទព្រះវិហារពីសំណាក់ទាហានថៃជាង៤០០គ្រាប់កាំភ្លើងធំនោះ និងការបាញ់មកលើតំបន់ផ្សេងៗនៃប្រទេសកម្ពុជា មិនមែនជាការផ្ទុះអាវុធដោយគ្រាន់តែខ្វែងគំនិតគ្នានោះទេ...ការពិតនេះជាសង្គ្រាម...ហើយសង្គ្រាមនេះមិនមែនត្រឹមតែឈ្លានពានទឹកដីប៉ុណ្ណោះទេ គឺឈ្លានពានដណ្តើមសម្បត្តិវប្បធម៌ថែមទៀត ដែលនេះជាមហិច្ឆតាថោកទាបក្រៅតម្រា ប្រាសចាកច្បាប់ជាតិ និងអន្តរជាតិ ។

សម្តេចបានថ្លែងថា រូបសម្តេចមានការភ្ញាក់ផ្អើលយ៉ាងខ្លាំង ខណៈដែលជួបសន្ទនាជាមួយលោកកូអុីជីរ៉ូ ម៉ាត់ស៊ូរ៉ា បេសកជនពិសេសរបស់អង្គការយូណេស្កូ ហើយលោកម៉ាត់ស៊ូរ៉ា ប្រាប់ថា ភាគីថៃគេទាមទារឱ្យដកប្រាសាទព្រះវិហារចេញពីបញ្ជីបេតិកភណ្ឌពិភពលោក និងបង្អាក់ការអភិវឌ្ឍលើតំបន់ប្រាសាទដ៏ល្បីល្បាញនេះ ព្រោះការដែលធ្វើបែបនេះនាំឱ្យមានការតានតឹងទាំងនយោបាយ និងយោធារវាងកម្ពុជា-ថៃ ។ សម្តេចតេជោបានលើកឡើងថា ការដាក់បញ្ចូលប្រាសាទព្រះវិហារទៅក្នុងបញ្ជីបេតិកភណ្ឌពិភព លោក និងការអភិវឌ្ឍប្រាសាទនេះ វាជាបុព្វសិទ្ធិរបស់កម្ពុជា ដែលជារដ្ឋអធិបតេយ្យពេញលេញ គ្មានពាក់ព័ន្ធជាមួយប្រទេសថៃ មកចូលរួមហ៊ុនហាយអ្វីទេ...ហើយម្យ៉ាងទៀតប្រាសាទព្រះវិហារមានតម្លៃជាសាកលត្រូវបានអនុម័តចុះបញ្ជីបេតិកភណ្ឌពិភពលោក ជាសម្បត្តិវប្បធម៌ពិភពលោក ដោយគណៈកម្មការរបស់អង្គការយូណេស្កូជាង១៨០ប្រទេសឯណោះ មិនមែនជាការលេងសើចសម្រាប់ថៃចង់បង្វិលតាមអំពើចិត្តនោះទេ។ សូមរំលឹកថា កាលពីឆ្នាំ១៩៥៤ថៃបានឈ្លានពានលើប្រាសាទព្រះវិហារម្តងរួចមកហើយ ប៉ុន្តែត្រូវបរាជ័យទៅវិញ ដោយសារគ្មានលក្ខណៈគតិយុត្តិគ្រប់គ្រាន់ និងចាញ់ក្តីកម្ពុជានៅតុលាការអន្តរជាតិឆ្នាំ១៩៦២ ។

សម្តេចបានសង្កត់ធ្ងន់ថា ឥឡូវនេះកម្ពុជាបានត្រៀមលក្ខណៈរួចរាល់អស់ហើយ សម្រាប់អ្នកសង្កេតការណ៍ឥណ្ឌូណេស៊ីដែលមកកាន់តំបន់ជម្លោះឆាប់ៗនេះ គឺកម្ពុជាត្រៀមកន្លែង១៤ចំណុច សម្រាប់អ្នកសង្កេតការណ៍ទាំងនោះ ដើម្បីបង្កលក្ខណៈងាយស្រួលដល់ពួកគេបំពេញតួនាទីពិនិត្យមើលការខូចខាត ពិនិត្យមើលទ្រង់ទ្រាយជម្លោះ ពិនិត្យមើលអ្នកបង្ករឿង និងពិនិត្យមើលភាពគិតយុត្តិរបស់ប្រទេសភាគីជម្លោះនីមួយៗ បើទោះជាភាគីថៃមិនឆ្លើយតបទាន់ពេលវេលាក៏ដោយ ។ ចាប់ពីពេលនេះទៅ ការចរចាទ្វេភាគីផ្សេងៗ ជាមួយថៃ គឺមានតែពាណិជ្ជកម្ម-សេដ្ឋកិច្ច ទេសចរណ៍...ប៉ុណ្ណោះ ប៉ុន្តែសម្រាប់ជម្លោះព្រំដែន និងការចង់លេបត្របាក់ព្រះវិហារ គឺត្រូវធ្វើឡើងមានអ្នកទី៣ចូលរួម...អាស៊ាន ឬអន្តរជាតិ...និងជាចុងក្រោយគឺត្រូវឆ្ពោះទៅកាន់តុលាការយុត្តិធម៌អន្តរជាតិ ដើម្បីស្នើឱ្យបកស្រាយសាលក្រមស្ថាពរដែលតុលាការនេះបានសម្រេចតាំងពីឆ្នាំ១៩៦២មកនោះ ៕

Quote of the news from Koh Santepheap Daily